Aizawl District chhunga Police Station hrang hranga thubuai ziah luh zingah inrawk leh rukrukna 65% a tling

 Rauthla 10.July, 2025 (Ningani) : Ni hnih chhung awh tur Aizawl District Crime Review Meeting, 2025 chu vawiin khan SP, Aizawl Conference Hall-ah tan niin he Crime Meeting hi naktuk thleng neih a ni ang. Meeting hi Aizawl SP Pu Rex Zarzoliana Vanchhawng-in  kaihhruaiin, Pu Ashok Malik, IPS, DIG (Northern Range) in  a hawng a ni. Meeting-ah hian Aizawl SP bakah, Aizawl District chhunga Sub-Divisional Police Officer (SDPO)-te, Police Station a Officer-in-Charge (OC)-te leh Investigating Officer (IO)-te an tel a ni. 

        Aizawl District chhunga Police Station hrang hrangah kumin January atanga June thla chhungin thubuai 818 ziahluh a ni a. Thubuai ziahluh atangin inrawk leh rukrukna a tam ber a, za zel a sawmruk leh panga (65%) a tling a ni. Rukruk thubuai za zel a sawmpali (14%) hi lirthei ruk thubuai a ni bawk. Thubuai ziahluh tawh zing a 107 chu Court-in chingfel tawhin heng zinga  za a sawmriat leh pakua (89%) ah thil tisualtute thiamloh chantir an ni bawk.  

India ramah Dan thar (New Criminal Law) July ni 1, 2024 atanga hman tan a ni a, mipuite hnena hrilhhriat leh zirtir hna nasa takin kalpui a ni. Ruihhlo laka mipuite, abik takin thalaite kan him theih nan Drugs Awareness Campaign a buatsaih thin a. Hursualna leh hleilenna laka hmeichhiate leh naupangte an him theih nan inzirtirna hun vawi tam tak buatsaih a ni bawk. Kum 2025 chhungin dan leh hrai chungchang inzirtirna (Awareness programme) vawi 24 buatsaih tawh niin, mi 4895 hnenah zirtirna pek an ni. 

Dan lova Mizoram rawn lut te endik hna Police Station hrang hrangten an thawk thin a. ILP nei lo emaw ILP dik lo a lo lut leh awmte check thin a ni. Kum 2025 chhungin ILP checking hi vawi 41 neih tawh niin dan bawhchhia mi 195 chu man an nih hnuah thuneitute hnen a hruai an ni tawh. 

Advertisement

No R.11012/3/2022 -LADC/REV

Lai Autonomous District Council
Land Revenue & Settlement Department

Notification
The 2nd June, 2025

Tunlai ruah sur nasat avangin Mizoram hmun hrang hrangah chhaitna a thleng mek a, inkal pawhna kawng pawh hmun tam takah a ping mek a: chuvangin, mipuite'n Nitin mamawh (Essential Commodities) awlsam taka kan hmuh theih nan leh harsatna kan tawh loh nan tun atanga thu leh awm hma atan heng a hnuaia market item tarlante hi dawrkai (Licence Holder) zawng zawng ten a hlawmin an pe chhuak tur ani lo tih kan inhriattir e.
1. Buhfai
2. Dal
3. Tel
4. Alu
5. Purunsen
6. Purunvar
7. Chi
8. Artui
9. Chini etc

Tin, mipuite pawhin mahni chhungkaw mamawh bak a hlawma in lak khawl phal ani lova, tin dawrkai (Licence Holder) te pawh ruah sur leh kawng chhiat avangin Market item rate tisang lo turin kan in hriattir nghal a. He Hriattirna ngaipawimawh lo tu te chu an chungah action lak ani ang a. An trade Licence cancel anih pawhin engmah an sawi buai thei lo ang tih kan inhriattir e.

Sd/-
A.Zaithanga
Senior Revenue & Settlement Officer
Land Revenue & Settlement Department
Lawngtlai

PR No.27 (LADC) 

US atangin Icon star Rsa'n khuarel chhiatna thlenga hman atan Rs. 40,000 pe

June 02, 2025: LPS Youth Icon star zinga thawm nei lian bera chhal ngam, J.Lalrosanga (Rsa) chuan khawvel letliama a zinna ram atangin a rama khuarel chhiatna thleng tuartute tan che chhuakin an kohhran kaltlangin Rs. 40,000 a thawn.

US-a awm Mizoten Chapchar Kut an hmanna hmanpuia zin mek, Rsa hian social media-a Salvation Army, India Eastern Territory (IET) hnuaia Emergency & Disaster Services hmalaknate a loh hmuh atangin chhiatna hrang hrang thlenga hma laknaa hman atan a zinna atang hian Mamit CO bial vawngtu, Commanding Officer Captain Joel Vanlalawmpuia kaltlangin sum hi a thawn a ni.

Tuidam tlangval hi Youth Icon 2024 khan Top 5-ah langin Top 50 intihsiaknaa 'Fuh chiang lo maw!' tih a sak atangin hriat a hlawh a, intihsiakna boruak pawh tiliantu bera chhal zui theih a ni.

Rsa hi a hma pawhin mi dangte tan a luang chhuak fo tawh thin a, a fan-te pawhin ama hmingin mi dang puihna thil an lo pe chhuak fo tawh thin bawk.

Mizoram Thalai Kristian Pawl rorel Vawi 71-na chuan Ram tan chawnghei tawngtai leh rilru hriselna chungchang in zirtirna neih nise an ti

Rauthla 14.02.2025 : Vawiin, February 14, 2025 (Zirtawpni) Dar 10:00AM khan Mizoram Ṭhalai Kristian Pawl (MṬKP) rorèl vawi 71-na, BCM Biak In, Lunglawn, Lunglei-ah neih a ni a, rorêl palâi an kal ṭha hle.

MṬKP rorêl vawi 71-na hi President Upa R. Lalrochama’n kaihruaiin, kum kal tàa ṬKP member ropuina rama kalte sûnna hun ngawi rengin minute khat dingin hman a ni a, Upa Dr. lalchhanhima Fanchun, Senior Adviser MṬKP-in an kalsan chhûngkua leh rawngbâwlpuite tâna ṭawngṭàisakna hun a hmang.

 

Vawiin MṬKP rorèlnaah hian rorêl palâi mi 588 kalin, Unit aiawhin mi 367, Bial aiawhin mi 163 leh MTKP Executive 31 te he rorelnaah hian an tel a, BCM General Secretary, F.D. Director, Fellowship Department, Bialtu Pastor leh Co-opted 3 te’n telpuiin heng bakah hian palâi sàwmte aṭangin MBMP, SSBATKP, TBYF ,ECMKTP, JSTKP, APBF, IKKCTP, CKJD leh CKBD te’n rorel hi an telpui bawk a ni. 

Secretary - Rev. F. Zorinkhuma hnèn aṭangin MṬKP hma lâkna hrang hrang report ngaihthlâk a ni a, kum 2024 rorèl leh 2025 rorèl inkârah ṬKP member ropuina rama kal mi 158 (Mipa 139 leh hmeichhia 19) an awm a, innei tuak 618 awmin, Kohhran Dân Puitlinga innei tuak 401 leh Dân tea innei tuak 235 an ni.

Finance Secretary Rbt. H. Lalruatkima leh Treasurer Nl. J. Lalrintluangi te’n sum dinhmun heti ang hian report an pe. Kum 2024 - 2025 chhûngin ₹ 61,21,067/- hmuh niin, hèng aṭang hian ₹ 54,27,042/- hman a ni a, kuta awm hi ₹ 6,94,025/- a ni. 

Ṭhalai Êntu Editor - Rbt. LH. Lalhmangaiha hnèn aṭangin Ṭhalai Êntu dinhmun ngaihthlâk chhunzawm a ni a, Ṭhalai Entu hi Hard Copy leh Digital Subscibtiona a awm tawh thute sawiin ṬKP member te’n a tam thei ang bera MṬKP Mobile Application kaltlanga Subscribe turin rorel palaite a ngen. Kum 2024 – 2025 chhûngin Ṭhalai Êntu (Hard Copy) hi copy 13,050 tihchhuah mêk a ni.

MṬKP Rorel vawi 71-na hian “MṬKP hma lâknain Ram tana chawnghei tawngtai neih ni se” tiin a rêl a, kum liam ta – 2024 khân Sorkar ṭha kan neih theih nân, Pathianni tlâi vawikhat chaw nghei ṭawngṭài te neih a lo ni tawh bawk.

 

Vawiin MṬKP rorêl hian kum 2024 - 2025 chhûnga hma lâkna tûr (Plan) hrang hrang heti ang hian a rêl a, budget ₹ 18,00,000/- ruahman a ni bawk. Chùngte chu –

 

1. BCM Pandal Structure puala unit tin fehchhuah neih ni se.

2. Ram tana chawnghei ṭawngṭai neih ni se.

3. MṬKP Youth Centre puala sum tuakna neih ni se.

4. ṬKP ten thlarau bo man beihpui thlak ni se.

5. MṬKP inkhawmpui dawltu tanpuina member tinah kumtin ₹ 50 khawn thin ni rawh se. 

6. Rilru hrisel chungchang zirtirna neih ni se.

7. MṬKP Website siam ni se.

Mizoram Ṭhalai Kristian Pawl (MṬKP) hnuaiah hian bial ṬKP 92 leh unit ṬKP 447 awmin, tun dinhmunah member 50364 (mipa 30562 leh hmeichhia 19802) an awm mek a, kum 2024 aṭanga member punna hi 1571 a ni.

BCM General Secretary kaihhruainaain MṬKP Office Bearers 2025-2028 hruaitu thlanna neih a ni a, heng mite hi thlan an ni:

Presiden : Upa R. Lalbiakzuala - BCM Rahsiveng

Vice President : Pu Jeffrey Lalremruata - BCM Salem

Secretary : Rev. F. Zorinkhuma - BCM Serkawn

Asst Secretary : Rbt. H. Lalruatkima - BCM Venglai

Treasurer : Nl. Grace Lalrindiki - BCM Gosen

Finance Secretary : Rbt. PC. Lalbiakdika - BCM Chanmari Vengthlangl

Senior Adviser :

1. Upa ZD. Lalnunmawia - BCM Serkawn

2. Upa K. Lalduhawma - BCM Salem

Lawngtlai District Agriculture Marketing Committee thukhawm

Rauthla  14,02.2025 :  Vawiin chawhma dar 11:00 khan Lawngtlai District Agricultural Marketing Committee (DAMC) chuan DC Conference Hall-ah thutkhawm an nei a, Pu Zoramsiam Hmar Addl.Deputy Commissioner, chuan thutkhawm hi a kaihruai. 

Pu Zoramsiam Hmar chuan  DAMC Member lo kalte hnena lawmthu sawina a nei hmasa a. Mizoram sawrkarin Bâna Kaih (Handholding Policy) a kalpui mekah Lawngtlai District chhunga Sawhthing, Aieng, Hmarcha leh Hmunphiah chingtuten hlawk leh man man zawka an hralh chhuah theihna tura theihtawp chhuah chhunzawm zel a nih thu a tarlang a. Addl. DC chuan DAMC Member te chu  Mizoram sawkarin 'Bâna Kaih' a ngaihpawimawh zia hre reng chunga  theihtawp chhuah tura chahin, kut hnathawktuten hlawkna  an chan ngei theihna turin duhsakna a hlan nghal bawk.  

Thutkhawm hi Dr. Malsawmdawngliana leh Pu Lalnunpuia, Mizoram Agricultural Marketing Board (MAMB) Co-opted Member  ten an telpui thei a. Pu Lalnunpuia chuan thlai thar hralh dan tura sawrkarin ruahmanna a siam dan leh a kalpui dan tur te, Secondary Collection Centre ( SCC)   leh Primary Collection Centre (PCC) chungchanga hriat tur pawimawh hrang hrangte inhrilh hriatna hun a hmang a, zawhna leh chhanna bakah  sawihona hun hman nghal a ni.

Vawiin Lawngtlai District Agricultural Marketing Committee (DAMC) thutkhawmah hian DAMC Member- te an telkim tha hle a, Pu Zoramsiama Hmar , Addl. DC, chuan lawm thu sawina neiin hun a khar. 

CADC Area a Village Council 88 te inthlan hun atan State Election Commission chuan March 12,2025 a puang fel ta

 Rauthla 14.02.2025 : Mizoram State Election Commission chuan Vawiin (14.02.2025) hian Chakma Autonomous District Council (CADC) huam chhunga Village Council (VC) inthlan hun tur an puang fel ta.

Dr.H.Lalthangliana, State Election Commissioner chuan, CADC area a Village Council inthlan hi March 12,2025 ah neih ani dawn a, Zing dar 7:00 Am atangin vote thlak tan ani ang a, tlai dar 4:00 pm thleng vote thlak hun hana ani ang. Hemi hnu hian vote tla te chhiar chhunzawm nghal tur ani bawk ang. 

Inthlan chuh tumte tan Feb 21, 2025 tlai dar 3:00 pm thleng hun Hawn ani ang a. Heng hming pe lut te zing a inhnukdawk duh an awm chuan February 24,2025 chhung dar 12 thleng hun Hawn ani bawk ang.

Chakma Autonomous District Council Area ah hian Village Council Area 88 a awmin, general seat 428 leh reserved seat 88 a vaiin Seat 516 a awm a, voters 37,883 an awm mek ani.

Hnahthial District VC election result ZPM VC 19, MNF 5, INC 2 leh majority awm loh a VC 6

Rauthla 13.02.2025 :  Hnahthial District chhunga Village Council Inthlanpui,2025 neih zawh taka vote tlate chu tluang taka chhiar zawh a ni a. District pumah Village Council 32 awmin a la tam ber, ZPM chuan 19 an la a ni. Vote hi nimin zing dar 7 atanga tlai dar 4 thleng khan thlak niin vote hi zan dar 7 atangin chhiar tan a ni a. Vote hi tukin zing dar 3 khan chhiar zawh a ni. 

Voter turnout hi report tlem tihdanglam awmin vote tla zawng  zawng hi 16,951 a ni a. Mipa 8483 leh Hmeichhia 8468 vote thlak an awm a ni. Uncontested VC voters leh PED voters chhiar telloh hian total voter turnout hi 73.91% a ni a. VC09013, Leite-ah voter turnout percentage sang berin PED leh Uncontested VC voters chhiar telloh hian vote hi 95.73% a tla a ni.

Hnahthial District Village Council 32-ah hian General seat 100 leh Reserved seat 34 awmin Seat hi a vaiin 134 a awm a. Candidates zawng zawng hi 352 awmin General Candidates 268 leh Reserved candidates 84 an awm a ni. 

Serchhip District VC seat 254 ah ZPM in seat 155, MNF seat 57, INC seat 36 leh Independent seat 6

Rauthla 13.02.2025 : February 12, 2025 zanlaiah Serchhip District a Village Council inthlan result chhiar zawh a ni ta a.  Seat awm zawng zawng 254 zingah ZPM in seat 155, MNF in seat 57, INC in seat 36, Independent in seat 6 an la a ni.

VC inthlan chuh tum hming pe 698 zingah General Seat chuh tu mi 524 awmin 174 te chuan reserved seat an chuh a; heng candidate zinga mi 11 te chu inhnukdawkin, chuhtu awm loa tlinga puan mi 7 an awm a. Nimina inthlan buatsaihah hian seat 247 an inchuh a ni.

Serchhip District chhunga Village Council 56 a inthlan result kimchang chu a hnuaia link-ah hian en theiha dah a ni.

Champhai District VC inthlan neih zawh takah ZPM VC 30, MNF in VC 15, INC in VC 3 ah hnehna an chang a, chak zawk hriat lohna VC 13 an awm

Rauthla 13.02.2025 :  Champhai District chhunga Village Council Inthlan neih zawh taka vote tla te chu tluang takin chhiar zawh a ni a. District chhungah hian Village Council 62 awmin, ZPM-in VC la hnem berin VC 30-ah hnehna an chang a, MNF-in dawtin VC 15-ah hnehna an chang a, INC-in VC 3 la ve bawkin, Independent-in VC pakhat an la a, chak zawk hriat lohna VC 13 a awm a ni.

Champhai District chhungah Village Council seat 290 – General 214 leh Reserved 76 a awm a. Seat mal anga chhiar chuan ZPM in Seat 136 – General Seat 101 leh Reserved Seat 35 lain, seat an la hnem ber a. MNF-in dawtin General Seat 78 leh Reserved Seat 29, a vaiin Seat 107 an la a ni. Pathumna INC-in Seat 37 – General Seat 27 leh Reserved Seat 10 ah te hnehna an chang a, Independent Candidate in seat 10 – General 8 leh Reserved 2 ah te hnehna an chang ve bawk a ni.

Khawzawl VC ah ZPM in seat 90, MNF in seat 49 leh INC 17 leh Independent seat 4

 Khawzawl Village Council Election Result

Rauthla 13.02. 2025: Village Council Inthlanpui 2025 chu Khawzawl district-ah tluang takin zawh fel a ni a, ZPM chuan VC 25-ah seat an la tam ber a, MNF chuan VC 7-ah seat an la tam ber a, independent candidate (party nei lo) chuan VC 1-ah seat an la tam ber a, VC 5-ah tam bik awm lovin party hrang hrang thlan tlin an ni.

Khawzawl district-ah hian village council (VC) zawng zawngah general seat 117 leh reserved seat 43 a awm a. ZPM candidate te'n general seat 68 leh reserved seat 22 an la a, a vaiin seat 90 an la. MNF candidate te'n general seat 34 leh reserved seat 15 an la a, a vaiin seat 49 an la. INC candidate te'n general seat 12 leh reserved seat 5 an la a, a vaiin seat 17 an la. Independent candidate te'n general seat 3 leh reserved seat 1 an la a, a vaiin seat 4 an la.

Village council inthlanna hmun hrang hranga Returning Officer te'n an puang a ni

LADC CEM Pu C.Lalmuanthanga'n banna a thehlut - Floor test neih a ni ta lo

 Lai Autonomous District Council ULP sorkar-na chu a tawp ta

Rauthla 12.02.2025 : Vawiin Ni 12.Feb,2025 hian Lai Autonomous District Council-a MNF leh Congress Party sorkar in tawm buk hun tura ruat a ni a, Nimahsela, Pu C.Lalmuanthanga, Chief Executive Member, LADC chuan Govenor ah CEM atanga banna a thehluh tak avangin sorkar buk a ngai leh ta lova, ti hian LADC ah ZPM in sorkar-na siam tumin hma an la dawn a ni.

LADC sorkar kal mek United Legislature party chu Floor test nei turin Govenor in emergency session ko turin a ti a. LADC Chairman Pu VL.Hmuaka chuan emergency session a koh chhan te session hall ah member te hriat ah a chhiar chhuak a. Hemi hnu hian Pu VL.Hmuaka Chairman hian Pu C.Lalmuanthanga, CEM banna a chhiar chhunzawm nghal a. Hemi anih avangh ian ULP sorkar chu buk ngai lovin a tawp ta a ni.

Dt 11.Feb,2025 khan Pu V.Zirsanga, Paithar Bialtu MDC, Pu Lallawmsanga Apetow Sekulh Bialtu MDC leh Nominated MDC pahnih Pi Z.Ngunchhini leh Pu Lalramfawna te hi MNF party atanga banna an thehlut a. Tun dinhmun ah hian party zawm la nei lo mahse, ZPM party hi zawm mai tura ngaih an ni a. An ni in ZPM party an zawm fel hnu hian ZPM Legislature party ten Leader an thlang ang a, chu an Leader thlan chu LADC a CEM tur a ni dawn a ni.