Mizoram Thalai Kristian Pawl rorel Vawi 71-na chuan Ram tan chawnghei tawngtai leh rilru hriselna chungchang in zirtirna neih nise an ti

Rauthla 14.02.2025 : Vawiin, February 14, 2025 (Zirtawpni) Dar 10:00AM khan Mizoram Ṭhalai Kristian Pawl (MṬKP) rorèl vawi 71-na, BCM Biak In, Lunglawn, Lunglei-ah neih a ni a, rorêl palâi an kal ṭha hle.

MṬKP rorêl vawi 71-na hi President Upa R. Lalrochama’n kaihruaiin, kum kal tàa ṬKP member ropuina rama kalte sûnna hun ngawi rengin minute khat dingin hman a ni a, Upa Dr. lalchhanhima Fanchun, Senior Adviser MṬKP-in an kalsan chhûngkua leh rawngbâwlpuite tâna ṭawngṭàisakna hun a hmang.

 

Vawiin MṬKP rorèlnaah hian rorêl palâi mi 588 kalin, Unit aiawhin mi 367, Bial aiawhin mi 163 leh MTKP Executive 31 te he rorelnaah hian an tel a, BCM General Secretary, F.D. Director, Fellowship Department, Bialtu Pastor leh Co-opted 3 te’n telpuiin heng bakah hian palâi sàwmte aṭangin MBMP, SSBATKP, TBYF ,ECMKTP, JSTKP, APBF, IKKCTP, CKJD leh CKBD te’n rorel hi an telpui bawk a ni. 

Secretary - Rev. F. Zorinkhuma hnèn aṭangin MṬKP hma lâkna hrang hrang report ngaihthlâk a ni a, kum 2024 rorèl leh 2025 rorèl inkârah ṬKP member ropuina rama kal mi 158 (Mipa 139 leh hmeichhia 19) an awm a, innei tuak 618 awmin, Kohhran Dân Puitlinga innei tuak 401 leh Dân tea innei tuak 235 an ni.

Finance Secretary Rbt. H. Lalruatkima leh Treasurer Nl. J. Lalrintluangi te’n sum dinhmun heti ang hian report an pe. Kum 2024 - 2025 chhûngin ₹ 61,21,067/- hmuh niin, hèng aṭang hian ₹ 54,27,042/- hman a ni a, kuta awm hi ₹ 6,94,025/- a ni. 

Ṭhalai Êntu Editor - Rbt. LH. Lalhmangaiha hnèn aṭangin Ṭhalai Êntu dinhmun ngaihthlâk chhunzawm a ni a, Ṭhalai Entu hi Hard Copy leh Digital Subscibtiona a awm tawh thute sawiin ṬKP member te’n a tam thei ang bera MṬKP Mobile Application kaltlanga Subscribe turin rorel palaite a ngen. Kum 2024 – 2025 chhûngin Ṭhalai Êntu (Hard Copy) hi copy 13,050 tihchhuah mêk a ni.

MṬKP Rorel vawi 71-na hian “MṬKP hma lâknain Ram tana chawnghei tawngtai neih ni se” tiin a rêl a, kum liam ta – 2024 khân Sorkar ṭha kan neih theih nân, Pathianni tlâi vawikhat chaw nghei ṭawngṭài te neih a lo ni tawh bawk.

 

Vawiin MṬKP rorêl hian kum 2024 - 2025 chhûnga hma lâkna tûr (Plan) hrang hrang heti ang hian a rêl a, budget ₹ 18,00,000/- ruahman a ni bawk. Chùngte chu –

 

1. BCM Pandal Structure puala unit tin fehchhuah neih ni se.

2. Ram tana chawnghei ṭawngṭai neih ni se.

3. MṬKP Youth Centre puala sum tuakna neih ni se.

4. ṬKP ten thlarau bo man beihpui thlak ni se.

5. MṬKP inkhawmpui dawltu tanpuina member tinah kumtin ₹ 50 khawn thin ni rawh se. 

6. Rilru hrisel chungchang zirtirna neih ni se.

7. MṬKP Website siam ni se.

Mizoram Ṭhalai Kristian Pawl (MṬKP) hnuaiah hian bial ṬKP 92 leh unit ṬKP 447 awmin, tun dinhmunah member 50364 (mipa 30562 leh hmeichhia 19802) an awm mek a, kum 2024 aṭanga member punna hi 1571 a ni.

BCM General Secretary kaihhruainaain MṬKP Office Bearers 2025-2028 hruaitu thlanna neih a ni a, heng mite hi thlan an ni:

Presiden : Upa R. Lalbiakzuala - BCM Rahsiveng

Vice President : Pu Jeffrey Lalremruata - BCM Salem

Secretary : Rev. F. Zorinkhuma - BCM Serkawn

Asst Secretary : Rbt. H. Lalruatkima - BCM Venglai

Treasurer : Nl. Grace Lalrindiki - BCM Gosen

Finance Secretary : Rbt. PC. Lalbiakdika - BCM Chanmari Vengthlangl

Senior Adviser :

1. Upa ZD. Lalnunmawia - BCM Serkawn

2. Upa K. Lalduhawma - BCM Salem

Lawngtlai District Agriculture Marketing Committee thukhawm

Rauthla  14,02.2025 :  Vawiin chawhma dar 11:00 khan Lawngtlai District Agricultural Marketing Committee (DAMC) chuan DC Conference Hall-ah thutkhawm an nei a, Pu Zoramsiam Hmar Addl.Deputy Commissioner, chuan thutkhawm hi a kaihruai. 

Pu Zoramsiam Hmar chuan  DAMC Member lo kalte hnena lawmthu sawina a nei hmasa a. Mizoram sawrkarin Bâna Kaih (Handholding Policy) a kalpui mekah Lawngtlai District chhunga Sawhthing, Aieng, Hmarcha leh Hmunphiah chingtuten hlawk leh man man zawka an hralh chhuah theihna tura theihtawp chhuah chhunzawm zel a nih thu a tarlang a. Addl. DC chuan DAMC Member te chu  Mizoram sawkarin 'Bâna Kaih' a ngaihpawimawh zia hre reng chunga  theihtawp chhuah tura chahin, kut hnathawktuten hlawkna  an chan ngei theihna turin duhsakna a hlan nghal bawk.  

Thutkhawm hi Dr. Malsawmdawngliana leh Pu Lalnunpuia, Mizoram Agricultural Marketing Board (MAMB) Co-opted Member  ten an telpui thei a. Pu Lalnunpuia chuan thlai thar hralh dan tura sawrkarin ruahmanna a siam dan leh a kalpui dan tur te, Secondary Collection Centre ( SCC)   leh Primary Collection Centre (PCC) chungchanga hriat tur pawimawh hrang hrangte inhrilh hriatna hun a hmang a, zawhna leh chhanna bakah  sawihona hun hman nghal a ni.

Vawiin Lawngtlai District Agricultural Marketing Committee (DAMC) thutkhawmah hian DAMC Member- te an telkim tha hle a, Pu Zoramsiama Hmar , Addl. DC, chuan lawm thu sawina neiin hun a khar. 

CADC Area a Village Council 88 te inthlan hun atan State Election Commission chuan March 12,2025 a puang fel ta

 Rauthla 14.02.2025 : Mizoram State Election Commission chuan Vawiin (14.02.2025) hian Chakma Autonomous District Council (CADC) huam chhunga Village Council (VC) inthlan hun tur an puang fel ta.

Dr.H.Lalthangliana, State Election Commissioner chuan, CADC area a Village Council inthlan hi March 12,2025 ah neih ani dawn a, Zing dar 7:00 Am atangin vote thlak tan ani ang a, tlai dar 4:00 pm thleng vote thlak hun hana ani ang. Hemi hnu hian vote tla te chhiar chhunzawm nghal tur ani bawk ang. 

Inthlan chuh tumte tan Feb 21, 2025 tlai dar 3:00 pm thleng hun Hawn ani ang a. Heng hming pe lut te zing a inhnukdawk duh an awm chuan February 24,2025 chhung dar 12 thleng hun Hawn ani bawk ang.

Chakma Autonomous District Council Area ah hian Village Council Area 88 a awmin, general seat 428 leh reserved seat 88 a vaiin Seat 516 a awm a, voters 37,883 an awm mek ani.

Hnahthial District VC election result ZPM VC 19, MNF 5, INC 2 leh majority awm loh a VC 6

Rauthla 13.02.2025 :  Hnahthial District chhunga Village Council Inthlanpui,2025 neih zawh taka vote tlate chu tluang taka chhiar zawh a ni a. District pumah Village Council 32 awmin a la tam ber, ZPM chuan 19 an la a ni. Vote hi nimin zing dar 7 atanga tlai dar 4 thleng khan thlak niin vote hi zan dar 7 atangin chhiar tan a ni a. Vote hi tukin zing dar 3 khan chhiar zawh a ni. 

Voter turnout hi report tlem tihdanglam awmin vote tla zawng  zawng hi 16,951 a ni a. Mipa 8483 leh Hmeichhia 8468 vote thlak an awm a ni. Uncontested VC voters leh PED voters chhiar telloh hian total voter turnout hi 73.91% a ni a. VC09013, Leite-ah voter turnout percentage sang berin PED leh Uncontested VC voters chhiar telloh hian vote hi 95.73% a tla a ni.

Hnahthial District Village Council 32-ah hian General seat 100 leh Reserved seat 34 awmin Seat hi a vaiin 134 a awm a. Candidates zawng zawng hi 352 awmin General Candidates 268 leh Reserved candidates 84 an awm a ni. 

Serchhip District VC seat 254 ah ZPM in seat 155, MNF seat 57, INC seat 36 leh Independent seat 6

Rauthla 13.02.2025 : February 12, 2025 zanlaiah Serchhip District a Village Council inthlan result chhiar zawh a ni ta a.  Seat awm zawng zawng 254 zingah ZPM in seat 155, MNF in seat 57, INC in seat 36, Independent in seat 6 an la a ni.

VC inthlan chuh tum hming pe 698 zingah General Seat chuh tu mi 524 awmin 174 te chuan reserved seat an chuh a; heng candidate zinga mi 11 te chu inhnukdawkin, chuhtu awm loa tlinga puan mi 7 an awm a. Nimina inthlan buatsaihah hian seat 247 an inchuh a ni.

Serchhip District chhunga Village Council 56 a inthlan result kimchang chu a hnuaia link-ah hian en theiha dah a ni.

Champhai District VC inthlan neih zawh takah ZPM VC 30, MNF in VC 15, INC in VC 3 ah hnehna an chang a, chak zawk hriat lohna VC 13 an awm

Rauthla 13.02.2025 :  Champhai District chhunga Village Council Inthlan neih zawh taka vote tla te chu tluang takin chhiar zawh a ni a. District chhungah hian Village Council 62 awmin, ZPM-in VC la hnem berin VC 30-ah hnehna an chang a, MNF-in dawtin VC 15-ah hnehna an chang a, INC-in VC 3 la ve bawkin, Independent-in VC pakhat an la a, chak zawk hriat lohna VC 13 a awm a ni.

Champhai District chhungah Village Council seat 290 – General 214 leh Reserved 76 a awm a. Seat mal anga chhiar chuan ZPM in Seat 136 – General Seat 101 leh Reserved Seat 35 lain, seat an la hnem ber a. MNF-in dawtin General Seat 78 leh Reserved Seat 29, a vaiin Seat 107 an la a ni. Pathumna INC-in Seat 37 – General Seat 27 leh Reserved Seat 10 ah te hnehna an chang a, Independent Candidate in seat 10 – General 8 leh Reserved 2 ah te hnehna an chang ve bawk a ni.

Khawzawl VC ah ZPM in seat 90, MNF in seat 49 leh INC 17 leh Independent seat 4

 Khawzawl Village Council Election Result

Rauthla 13.02. 2025: Village Council Inthlanpui 2025 chu Khawzawl district-ah tluang takin zawh fel a ni a, ZPM chuan VC 25-ah seat an la tam ber a, MNF chuan VC 7-ah seat an la tam ber a, independent candidate (party nei lo) chuan VC 1-ah seat an la tam ber a, VC 5-ah tam bik awm lovin party hrang hrang thlan tlin an ni.

Khawzawl district-ah hian village council (VC) zawng zawngah general seat 117 leh reserved seat 43 a awm a. ZPM candidate te'n general seat 68 leh reserved seat 22 an la a, a vaiin seat 90 an la. MNF candidate te'n general seat 34 leh reserved seat 15 an la a, a vaiin seat 49 an la. INC candidate te'n general seat 12 leh reserved seat 5 an la a, a vaiin seat 17 an la. Independent candidate te'n general seat 3 leh reserved seat 1 an la a, a vaiin seat 4 an la.

Village council inthlanna hmun hrang hranga Returning Officer te'n an puang a ni

LADC CEM Pu C.Lalmuanthanga'n banna a thehlut - Floor test neih a ni ta lo

 Lai Autonomous District Council ULP sorkar-na chu a tawp ta

Rauthla 12.02.2025 : Vawiin Ni 12.Feb,2025 hian Lai Autonomous District Council-a MNF leh Congress Party sorkar in tawm buk hun tura ruat a ni a, Nimahsela, Pu C.Lalmuanthanga, Chief Executive Member, LADC chuan Govenor ah CEM atanga banna a thehluh tak avangin sorkar buk a ngai leh ta lova, ti hian LADC ah ZPM in sorkar-na siam tumin hma an la dawn a ni.

LADC sorkar kal mek United Legislature party chu Floor test nei turin Govenor in emergency session ko turin a ti a. LADC Chairman Pu VL.Hmuaka chuan emergency session a koh chhan te session hall ah member te hriat ah a chhiar chhuak a. Hemi hnu hian Pu VL.Hmuaka Chairman hian Pu C.Lalmuanthanga, CEM banna a chhiar chhunzawm nghal a. Hemi anih avangh ian ULP sorkar chu buk ngai lovin a tawp ta a ni.

Dt 11.Feb,2025 khan Pu V.Zirsanga, Paithar Bialtu MDC, Pu Lallawmsanga Apetow Sekulh Bialtu MDC leh Nominated MDC pahnih Pi Z.Ngunchhini leh Pu Lalramfawna te hi MNF party atanga banna an thehlut a. Tun dinhmun ah hian party zawm la nei lo mahse, ZPM party hi zawm mai tura ngaih an ni a. An ni in ZPM party an zawm fel hnu hian ZPM Legislature party ten Leader an thlang ang a, chu an Leader thlan chu LADC a CEM tur a ni dawn a ni.

Lalnunfeli - Feli Fanai tia hriat lar chu Kum 32 mi niin khawvel a chhuahsan ta

Rauthla 12.02, 2025: Zo rimawi khawvel fanu hrin ropui ber zinga mi, Feli Fanai tia hriat lar, Lalnunfeli Fanai chu Nilaini zing dar 2:15 khan a thi. Kum 32 mi a ni.

Feli Fanai hi Ebenezar Hospital-ah a thi a. Natna neuh neuh nei niin, damdawi in a awm chhung hian a hun tam zawk chu ICU-ah enkawl a ni.

Lengzem khawvelin a hriat reng tawh tur Feli Fanai hi December 20, 2024 khan a taksa a chauh zual deuh avangin Aizawl Hospital panpui a ni a, damdawi in panpui a nih hian ICU lamah enkawl tura dah luh nghal a ni.

Aizawl Hospital-ah theihtawp chhuah enkawl a nih hnuah, hma a sawn chak hleih theih loh avangin beiseina sang tak nen January 6, 2025 tlai dar 5 khan Ebenezar Hospital-ah phurh thlak a ni a. ICU luhpui nghal a ni a. Hemi hnu hian damin Hospital hi a chhuahsan leh tawh lo!

Lengzem arsi lian - Feli Fanai ruang hi, Ramhlun North Industry Mual-a a pute inah chawlhpui a nih hnuah, ambulance hmangin Champhai panpui a ni ang.

Naupang tê niin Zo rimawi khawvelah 'Min Hlan Leh La' music video hmangin a zuang lut a. Heta tang hian a hawi kir leh tawh lo a, thuk zawka rimawi tuipuia a inhnimphum chhoh zel hnuah, November 19, 2013 khan a studio album hmasa ber, mi hrang hrang hla phuah 10 awmna — Fam Khawlawi — album chu Chanmari YMA Hall-ah a tlangzarh a. He an album hi a hringtu, a pa thih champhaphakah chiah, a pa hriatreng nan a tlangzarh nghe nghe.

A debut album a tihchhuah atanga kum sarih hnuah, an album pahnihna leh a hnuhnung ber tur ni ta chu January 30, 2020 khan a tichhuak leh. A album title pawh — Tuma'n An Tluk Lo — tih a ni. He album-ah hian tracklist 13 a awm a. He album erawh digital platform kaltlanga tihchhuah niin, Apple Music-ah te a dah thung.

He a album-ah hian a single hit ber ber — album title 'Tuma'n An Tluk Lo' bakah, 'Pheichhehmawi I Khai Ang Aw' tihte, 'Lengdang Tang A Bel' tihte; Michelle Varte leh Zaii Hauchhum te nena an siam 'Ka Tan I Mawi' tihte a dah bakah, a debut studio album-a a hla pahnih — Then Che Ka Hlau leh Min Hlan Leh La — tihte pawh a dah tel leh nghe nghe.

END ten Zu leh a siamna tichhia

Rauthla 11.02.2025 : Excise and Narcotics Department chuan vawiin (11.2.2025) chhun khan Aizawl chhehvela dan phal loha zu siamna hmun dap chhuah beihpui an thlak.

Naktuka Mizoram chhunga Local/Village Council inthlanna lo awm turah inthlanna muanawm leh felfai neih a nih theihna turin Excise & Narcotics Department hian Aizawl chhehvel (Phunchawng leh Rangvamual) rama dan loa zu siamna hmun dapchhuakin beihpui an thlak a, zu siamna leh a hmanrua eng emaw zat an manin, an ti chhia.

Excise & Narcotics Department hian zu siamna hmun 48, zu bilhlai tins 4,820, rakzu litres 140, zu siamna bel 70 leh zu siamna dawidim kgs. 2 an manin, an tichhia a ni.

Local/Village Council inthlanniah hian Zu leh ruihhlo en gang chi pawh chelek lo turin Excise & Narcotics Department chuan mipuite an ngen a ni

MTKP Inkhawmpui Lunglawn Pastor Bial-ah - Inkhawmpui registration fee atan Rs 50 zel

 Rauthla 11.02.2025 : Vawiin khan Mizoram Thalai Kristian Pawl hruaitute chuan Lunglei hmuna thuthar thehdarhtute kawmin MTKP Inkhawmpui vawi 48-na lo awm tura inbuatsaih na hrang hrang an neih dan te an sawi.

Mizoram Thalai Kristian Pawl Inkhawmpui Vawi 48-na hi Lunglawn Pastor Bial ten an thleng dawn a. Kumin inkhawmpui hi Dt 13-16, Feb, 2025 hian neih a ni ang a, thupui atan ‘Pathian Hnaih Rawh’ tih ani ang a, mi hrang hrang ten thupui then hrang hrang hmangin Pathian thuchah hi an sawi dawn a ni.

MTKP Inkhawmpui neih hnuhnungber hi Tlabung Leicheng Field kha a ni a, Kum 2022 a nei leh tur anih laiin hri leng (Covid-19) avangin neih chhunzawm theih ani ta lova. Tichuan, kumin 2025 hian Lunglawn mual ah an thleng dawn ta a ni.

Inkhawmpui budget atan hian a dawltu Lunglawn Pastor Bial ten Rs 70,00,000/- an ruahman a. Hemi atang hian MTKP chuan Rs 42,00,000 a hlan a, a bak zawng chu Bial-in a ngaihtuah ang. 

Kumin hian a vawikhatna leh Mizoram Kohhran Thalai Pawl inkhawmpui atan a hmasa ber ni turin MTKP Inkhawmpui registration fee mi pakhat tan Rs 50/- zel nise, an tih chu an kalpui tan a. Hei hi inkhawmpui dawltu lam senso hautak lutuk phuruk nan tih a ni. Tin, hemi bakah hian TKP member tinte hnen atangin Rs 20/- zel Inkhawmpui dawltu tanpuina hi member pakhat zel in an thawn bawk thin a ni. Tin, Kumin rorel ah hian Inkhawmpui dawltu tanpuina member pakhatah Rs 20/- zel kan khawn thin hi Rs 50/- ni tawh se tih rawtna te pawh a luh bawk a, hei hi kan kalpui  thei anih chuan inkhawmpui dawl leh zel turte tan pawh a tangkai hle in kan ring ani.

        Kumin kan inkhawmpuina tur Pandal hi BCM-in nuai 150-a a lei a ni a, MTKP ten kan hmang hmasa ber tur hi kan lawm hle a ni. Pandal Structure hi a dung 150ft a ni a, avang lam hi 120ft a ni thunga, Mizo Heritage Industry, Aizawl-te siam a ni. Kan Pandal Strcuture ah hian kan len dawn loh avangin extend a ni a, kan extend hnuah hian a dung 230ft avang 184ft a ni tawh a ni.

MTKP inkhawmpuiah hian kan Pandal hming vuah/phuah kan ching zauh zauha. Kumin kan Inkhawmpui Pandal hming atan hian “Krista Pasaltha te Run” tih vuah a ni a, hei hi a dawltu Lunglawn Pastor Bial hian Krista tana rawngbawl tura hun puma in pe, Pastor leh Missionary engemaw zah a lo chher chhuak tawha, a then te phei chu Krista avanga Martar hial te pawh an lo awm tawh a. Chung ‘Krista tana Pasaltha’ te pual chuan ‘Krista Pasalthate Run’ tiin kan Inkhawmpui Pandal hming hi sak a ni. 

MTKP Inkhawmpuia kan programme hman te hi Mizoram TKP Youtube channel (www.youtube.com/@mizoramthalaikristianpawl6945)-ah Live a pek chhuah \hin a ni dawn a. A hmun a kal remchang ve thei lo te pawhin MTKP Youtube channel kaltlang a an thlir theih tura buatsaih tum a ni bawk.

Vawiin a Lunglei chanchinthar thehdarhtute nen inkhawmhona hian Upa R.Lalrochama, MTKP President hovin MTKP hruaitute hi an tel a ni.

State Election Commissioner in LC leh VC inthlanna ah mipuite vote thlak theuh turin a sawm

 Rauthla 11.02.2025 :   Kum 2025 Village Council leh Local Council inthlanpui naktuka nei turin, inpuahchahna peih a ni tawh tih State Election Commissioner Dr. H. Lalthlangliana chuan a sawi a, mipuite vote thlak theuh turin a sawm.

State Election Commissioner-Dr.H.Lalthangliana chuan, naktuka VC leh LC inthlanpui neih turah harsatna lian tham tawk loin tluang taka inthlan nei turin inpuahchah fel a ni tawh a ti a, hetihlai hian candidate thihna avangin Lunglei district Lalnutui VC inthlan chu ningani ah sawn a nih bakah Lawipui Local Council inthlan pawh zirtawpni ah sawn a ni tih a sawi a, mipuite chu rilru fim tak hmanga vote thlak theuh turin a sawm a ni.

Inthlan hi naktuk nilaini zing dar 7 atangin vote a thlak theih dawn a, ruahman ang chuan tlai dar 4 thleng vote thlakna hun hawn a ni dawn a, hun tiam chhunga vote thlak hman lo, Polling Station huamchhung thleng hman si te tan erawh vote a thlak chhunzawm theih dawn a ni. Vote tla te hi naktuk zan dar 7 atangin a rualin chhiar nghal a ni ang a, dar 7 a vote thlak la zawh lohna Polling Station a vote tla te chu inthlan zawh veleh vote chhiar nghal a ni dawn bawk a ni.

Village Council inthlan turah hian District pakuaa VC 544 ah Seat 3894 a member turte thlan an ni dawn a, heng zinga seat 982 chu hmeichhe tana hauh a ni a, VC ah hian candidate 6829 an awm a ni. Aizawl Municipal Corporation leh Lunglei Municipal Council huamchhung Local Council 111-a seat 723 ah candidate 2076 an awm a, hmeichhe tana hauh seat 195 a awm bawk a ni.

MIZORAM SORKAR HI FAPA TLANBO DINHMUN NEN A IN ANG DAWN - DR. K. BEICHHUA, MLA.

 Rauthla 11.02.2025 : Nimin khan Dr.K.Beichhua MLA & State Core Group Member nibawk chuan BJP Office Aizawl thusawiin, Mizoram sorkar hi fapa tlanbo dinhmun nen a inang dawn, a ti . 

Pu Beichhua chuan, "Mizoram ah Congress Party chuan thu dik chanve pawh ni manglo dawt hmangin BJP an beih avangin kan la hniam deuh hlek a, nimahsela chutianga Congress Party-ina min beih lai mek chuan tuna Congress Party dihmun chu kan hmuchiang hle a, tun ?um Delhi-a inthlan neihah pawh Congress Party dinhmun chu Zero a ni. Mizoram ah tlem in Delhi ai chuan an tha hret a, a chhan chu; MLA pakhat an neih vang a ni. Delhi ah sawrkarna a zawna term hnih (2) AAP-in an lak hnuah India ram khawpui ber Delhi ah chuan hneh takin BJP chuan Sorkarna kan la thei a, Mipuiin BJP ah rinna an nghat nasa hle a ni tih Result kan hmuh atang hian a lang chiang hle a ni," a ti.

Dr. K. Beichhua chuan, "India ramah Congress Party chu a zung a nget tawh a, that chhuah leh a har viau dawn a ni. Chuvangin Mizoram ah pawh Congress Party hian awngrawp lam a pan a, tunah MLA pakhat an nei a, nimahsela nakin lawk ah erawh Mizoram ah pawh Gold Medal la phak si lovin, Silver Medal leh Bronze Medal lak hi an hna ber tur a ni tawh dawn a ni," a ti.

Dr K Beichhua chuan sawichhunzawmin, "tun dinhmuna BJP hlaua, hnualsuat tute chu Kum lama upa tawh deuh leh tunlai thil chinchang ngaihtuah thui lutuk lo deuh te an ni tlangpui a, Congress Party-in  BJP lian tur hi an hriat lawk avang leh BJP an lian a nih chuan Congress tan din chhuah leh a harsa dawn tih an hriat avangin nasa takin an lo bei lawk a, chumi rah thalo tak chu Mizoram hian kan seng ta a ni, kan State Sorkar chu rethei leh harsa tak nimah ila, BJP thawhpui an hreh avangin sum puk tur zawngin an phi ruai a, thlatin mai Sum an puk ta tlauh tlauh mai a ni. Mipui a an in zawrhna an thutiam an ti hlawhtling hleithei lova, kumin 2025 February 20 Mizoram State Day VC/LC inthlan zawh ah pawh Sawhthing kan lei ang an ti a, chhuanlam dang an siam leh dawn nge an intiam angin an lei sak dawn tih chu kan lo thlir dawn a ni. Tin, kawngpui siam that nan Oil man an tisang a, Fur laiin kawngsiam theihloh chhuan lam atan sum a awm vek tawh ti chunga, thal lai pawh a kawngchhiat avanga harsatna kan la tawk leh mek thung si te hi a mak hle a ni. Chuvangin ZPM Sorkar kan hrawn mek hi Fapa tlanbo dinhmun nen te pawh an in ang dawn viau mai a, tunah hian min bel lovin tlan tlan mah sela, an tlanbo na ah eitur an tla chham anga, ei tur an hmuhloh hun engtikah emaw chuan inchhir hun an la neiin, an la rawn inlamlêt ngei dawn a ni," a ti bawk.

Pu Beichhua Delhi inthlan chungchang sawiin, "Delhi-a AAP Sorkar khan mipui tana an tih theih tur hrang hrang an chhawpte chu kan hre awm e. Delhi mipui tana lal an duh vanga an intiamna chu Mipuite hnenah a free-a thil tihsak kha a ni hlawm a ni. Vawiinah erawh AAP tlakchhiat chhan chu Corruption a ni tih kan hre awm e. Mizorama mi tam takin an sawi dan ve thung chu BJP-in AAP an hrek vanga tla ah min puh a, nimahsela AAP hruaitu pa Arvind Kejriwal-a chu Corruption avangin a mualphova, Jail ah hial a tang a, AAP tlak chhan chu, Delhi mipuiin an duh tawh loh vang a ni" a ti bawk.

March 2019 - Feb 10, 2025 chhungin Mizoram Lokayukta hnuaiah case 71 ziah luh tawh a ni

 Rauthla 11.02.2025 : Mizoram Lokayukta Act, 2014 chhunga Section 47 in a phut angin Pu Lalmalsawma, Chairperson, Mizoram Lokayukta chuan Governor Gen (Dr) Vijay Kumar Singh, PVSM, AVSM, YSM (Retd) hnenah Mizoram Lokayukta Fifth Annual Report 2023-2024 chu vawiin khan Raj Bhavan-ah a hlan. Annual report hian April ni 1, 2023 leh March ni 31, 2024 inkar a huam a, Mizoram Legislative Assembly-ah pharh a ni dawn a ni.

He hunah hian Governor Gen (Dr) Vijay Kumar Singh, PVSM, AVSM, YSM (Retd) chuan Mizoram Lokayukta Chairperson Pu Lalmalsawma bakah hian Pu Lalsanglura, Member leh Pu Joel Joseph Denga, Member (Judicial) te chu an hmalakna hrang hrangte sawipuiin, Chairperson-in Mizoram Lokayukta dinhmun leh hmalakna tlangpui a tarlang a. Mizoram Lokayukta hnuaia case neih dan leh bawhzui dante bakah dinhmun leh thlen chinte Governor hi an hrilh bawk a ni. 

Annual report-in a tarlan dan chuan kum 2023-2024 chhung khan Mizoram Lokayukta hnuaiah eirukna thubuai case 8 ziahluh a ni a; heng case 8 te hi preliminary inquiry tura tih niin, heng zinga case 7 te report hi dawn tawh a ni. March 2019 a Mizoram Lokayukta din a nih atanga nimin February ni 10, 2025 thleng khan Mizoram Lokayukta hnuaiah case 71 ziahluh tawh niin, heng zinga case 46 te hi chhuizui tlaka ngaih a ni a. Case hearing tum 38 neih tawh a ni a, thiamloh chantir 4 leh thiam chantir 1 an awm tawh a. Department proceeding tura tih case 3 a awm tawh bawk.

Feli Fanai dinhmun in hma a sawn hret hret - Thisen pek belh zel a la ni

Ruathla February 11, 2025: Nimin lamah a dinhmun hniam viauin lang mah se, vawiin lamah erawh Feli Fanai dinhmun a kang rih viau.

Ebenezar Hospital ICU-a enkawl mek, zaithiam Feli Fanai chanchin hian ngaihventu a ngah hle. Nizan lamah pawh mitthi dar lo vuaksak a, a chanchin dik lo thehdarhin mi tam tak a ti phawklek hman hle a nih kha.

 Thudawn danin, Feli Fanai hi tunah rih chuan a BP pawh a thain, oxygen level pawh a stable rih viau a. Nimin lam aiin vawiin lamah a dinhmun pawh kang rih viau niin a lang.

 Feli Fanai tan hian vawiin chawhma khan mi pathumin thisen an pe a, thisen pe zingah Brig. Girish Upadhya, DIG, HQ 23 Sector Assam Rifles pawh a tel.

Saitual District-a General to Village Council 2025 inthlan buatsaihna tur hmanruate sem chhuah a ni

Rauthla 11th February, 2025: Saitual District-a naktuk February ni 12, 2025 (Nilaini)-a General Election to Village Council 2025 inthlan lo awm tur buatsaihna atana hmanrua leh bungraw pawimawh chi hrang hrang Voting Compartment, Ballot Paper, Ballot Box leh Stationery item te chu tukin zing dar 8:00 am khan DC Ofiice, Saitual atanga pek chhuah a ni.

Saitual District huam chhungah hian Village Council 46 te inthlang tur an ni a, polling station 55 leh auxiliary polling station 10 awmin, a vaiin polling station hi 65 a awm a. Hrianghmun Village Council- ah uncontested (chuhpuitu awm lo)-a member pathumte tlinga puan an nih tak avangin Village Council 45-ah inthlan a ni thung ang a, polling station 64-ah vote thlak a ni bawk ang. Vawiina inthlanna hmanrua leh bungrua semchhuahte hi polling party te chuan  an polling station theuh an thlenpui dawn a ni

Mizoram State Cooperative Union (MSCU) Branch Champhai ah hawn tum mek ani

Rauthla 11th February, 2025 : Vawiin khan Mizoram State Cooperative Union (MSCU) Board of Directors chu an President Pu K.Lalchamreia kaihhruaina hnuaiah MSCU Meeting Room, Dawrpui-ah an thukhawm.

Meeting-ah hian Mizoram State Cooperative Union kum 50-na (Golden Jubilee) March ni 29, 2025 a lo thleng tur chu lawmna buatsaih an rel a, a hun atan hian March ni 27, 2025 (Ningani) an ruat a, Golden Jubilee lawmna programme pawh an duang nghal a ni.

Vawiin meetingah hian kum kalta chhung khan MSCU Branch pahnih Serchhipah leh Kolasibah hawn a nih thu tarlan a ni a, Champhaiah pawh hawn tuma inbuatsaih mek a nih thu tarlan a ni.

Mizoram State Cooperative Union hi kum 1975 khan Registration No.B.1/74-75 Dt.29.03.1975 hmanga din a ni a. MSCU hnuaiah hian Board hrang hrang 13 a awm mek a ni.

LADC Online Tax Portal Launching Programme Pu C. Lalmuanthanga, CEM LADC hovin hman a ni.

 Rauthla 11.02.2025 : Nimin khan LADC Online Tax Portal Launching Programme chu, LADC CEM's Conference Hall-ah, Pu C. Lalmuanthanga, CEM LADC hovin hman a ni.

LADC CEM Pu C. Lalmuanthanga chuan thusawiin, tuna kan hun hman hi LADC tan thil chhinchhiah tlak tak a ni a, Lairam mipuite tan samkhai zawka chhiah pek anih theihna tura hma min lakpuitu Pu HK. Jessy Laltha-hluana, Branch Manager, HDFC Lawngtlai leh a thawhpuite, LADC Lang Revenue & Settlement Department-te leh Information & Communication Technology Dept, LADC thawktute chungah lawmthu ka sawi tak zet a ni, a ti.

Pu Lalropuia Chinzah, Executive Member i/c Information & Communication Technology Department chuan Inauguration Address hun hmangin, LADC hmalakna leh Tax Portal chungchanga hma-lakna pawi-mawhte a tarlang:-

1. Lai Autonomous District Council  chuan mipui rawng-bawlna leh inrelbawlna senso tih phuisui nan hengah te hian TAX a khawn thin a:-

1)Professional Tax

2)Entry of Goods into Market Tax

3)Entry of Vehicle Tax

4)Entertaiment Tax

5) Land Revenue Tax

Tin, heng bakah hian Toll Gate-te, Parking Fee-te leh royalty payment hmang te in mipui hnen atangin sum a la lut thin bawk. 

2.LADC hnuaia Tax lakluhin hma a sawn theih nan Online Payment hmanga Tax pek theihna turin ruahmanna kan siam ve thin a. Mahse, sum indaihlohna avangin kan ti hlei thei lova. Tichuan, chung ruahmanna tih hlawltlinna turin LADC chuan:- 

(1) Information and Communication Technology chu Department puitlingah July 9, 2024 khan hlankai ani a, an niin hma an la tan a.

      (2) Tuna LADC Tax Portal bul tanna a tan kan CEM zahawm tak Pu C. Lalmuanthanga, leh  Pu HK Jessy Lalthahluana, HDFC Lawngtlai Manager te inkawmna atangin rah tha a chhuak ta a.

(3) September 11, 2024 khan  Nl. Lalhmingmawii, Area Head, HDFC, Mizoram Aizawl Lawngtlai-ah lo kalin LADC lam hotute nen Meeting pawimawh tak neih a ni a. Tuna kan Launch tur LADC Tax Portal hmahruaitu a tan Land Revenue & Settlement Department hnuaia ‘Land Leased’ bik hi tih hmasak ni se tih a lo nita a ni.

(4) He kan Online Tax Payment hi duhthusamin a la thalo pawh a ni thei a, mahse hei aia tha zawk turin Department-te an inbuatsaih mek a. Mipuite, LADC Office-a kal kher ngai lova, mahni awmhmun a tang a chhiah pek dan awlsamna kawng kan zawng zel dawn a ni, a ti.

(5) Tuna LADC Tax Portal hi HDFC Qfix Team ten a thlawn liau liau a an siam a ni

Pu HK. Jessy Lalthahluana, Branch Manager, HDFC Lawng-tlai pawhin thusawiin, LADC nena thawhhona tha tak kan nei thei hi kan lawm hle a, thawhhona tha tak kan neih theihna tura, hma min lakpuitu kan hruaitu pawimawh tak tak, Pu C. Lalmuan-thanga CEM, Pu Lalropuia Chinzah, Executive Member LADC leh a thawhpuite chungah lawmthu ka sawia, hmalam hunah pawh thawhhona tha tak kan neih zel ka beiseia, HDFC Bank hian Mipuite tan awlsam zawka Tax an pek theih dan hi kan ngai pawimawh em em a, Department dangte nen pawh hma kan lo la tawh thin a ni, a ti.

DR. LORRAIN LALPEKLIANA CHINZAH ADVISER TO CHIEF MINISTER IN LAWNGTLAIA FIRE PREVENTION WEEK 2025 HAWNNA HMANPUI

Rauthla 11.02.2025 : Nimin khan 'Fire Prevention Week 2025' hawnna inkhawm chu  DC Conference Hall-ah neih a ni a. He hun hi Pi Margaret J. Vanlalremmawii, SDO (S) chuan kaihruaiin, Dr.Lorrain Lalpekliana Chinzah, Adviser to Chief Minister chuan khuallian niin a hmanpui.

Dr. Lorrain Lalpekliana Chinzah chuan kalkhawmte hnena lawmthu sawina nei hmasain, Pi leh Pute atanga Lo nei mi kan nih angin, kangmei hian kan nunah nghawng tam tak a lo nei tawh thin avangin, ngaihpawimawh pawh tul hle a ni, a ti a. Ram kang hian thing leh mau bakah ramsa leh nungchate chenna a tichereu a, leilungin a hânna hlauhin, tui hna nasa taka tihkiamin a awm thin a, a tuartu zingah mihringte pawh an tel thin a ni, a ti. Adviser to Chief Minister chuan Mizorama ramkang tam zawk hi mihringte vanga chhuak a ni tih tarlangin, hei hian fimkhur a tul zia a tilang chiang hle a ti.

Adviser to Chief Minister chuan Forest Survey of India 2021, report danin Mizorama Forest Cover chu 84.5 % ni mêk mah se, ramngaw tihchereu dan chhutin,  theihtawp chhuaha ramngaw venhimna kawnga tan tak a tul hle a ti. Kum tinin khua a lum zel a, sik leh sa nasa takin a inthlak danglam a, Global warming leh Climate change hian khawvel a tibuai tak zet tih sawiin MLA chuan ramngaw humhalh kawngah theihtawp i chhuah tlang ang u tiin a sawm a.  Dr. Lorrain Lalpekliana Chinzah chuan Mizorama ramngaw tamzawk chu awlsam taka kangmei chhuahtheihna a awm a ni tih tarlangin, hetiang dinhmuna awm mek a nih lai hian ram luahtu mipuite chu ngaihthah mai lova, thahnem ngai  taka ramngaw leh nungchate humhalh turin a chah. 

Pu Albert Lalrinzuala, Sr. ACF, LADC chuan Fire Prevention Week puala kum hmasa lama hmalakna hrang hrang tarlanna neiin, Fire Prevention Week -2025 thu intiamkamna (pledge) sawihona a kaihruai a. Fire Prevention Week hi kum tinin thupui thlan bik nei a hman thin a ni a, Kumin thupui atan 'Kangmei ven hi kan tu leh fate hmakhua tan a ni'  tih thlan a ni a. Lawngtlaiah chuan February ni 10- 15 chhung hman a ni ang.

    'Fire Prevention Week 2025' hawnna inkhawmah hian sawrkar department, NGO, VC leh Kohhran aiawhte an tel kim tha hle a, Pu Elvis Lalthangzuala, President, MJA, Lawngtlai District chuan lawmthu sawina neiin hun a khar.

CADC Village Council inthlan lo awm turah Final Electoral roll tlangzarh

Rauthla 11.02.2025 :  Nimin khan Chakma Autonomous District Council (CADC) huamchhunga Village Council (VC) inthlanna neih tur atana  'Final Electoral Roll' tlangzarhna inkhawm chu  SDO (C) Office, Chawngte ah neih a ni a. Pu Zoramsiama Hmar, Deputy District Election Officer (DEO) chuan Final Roll hi  tlangzarhin, Pu Collin Hlychho, Election Officer (EO) chuan inkhawm hi a kaihruai.

Pu Zoramsiama Hmar  chuan 'Final Electoral Roll' tlangzarh theih tura theihtawp chhuahtute chunga lawmthu sawina a nei hmasa a. Democracy ramah mipuiten an aiawh an thlang thin a, inthlanna fel fai leh thianghlim awm turin uluk taka hmalak leh hnathawh mek a nih thu a tarlang a. Village Council Member-te chu khawtlang mipuite innghahna leh a bulthut a hnathawktu tur an nih avangin VC Member thlanchhuah kawngah mipuite fimkhur turin a chah a.  Ralmuang leh zalen taka inthlanna awm tura Election Official- te theihtawp chhuah tura fuihin, Pu Zoramsiama Hmar chuan CADC huamchhunga tlawmngai pawl hrang hrang leh mipuite thawhpuiah sawmin, mi tha leh rintlak thlangchhuak turin duhsakna a hlan nghal bawk.

Nimina 'Final Electoral  Roll' tlangzarh atanga a lan danin,  CADC huamchhungah  VC-  88 awmin,  mipa vote nei mi- 19,162  leh hmeichhia vote nei mi-  18,721  awmin, a vaiin vote nei mi- 37,883 an awm a ni. Ralmuang taka Inthlanna fel fai leh thianghlim nei tur hian Polling Station pa nga - Borapansury -II, Kamalanagar -I, Kamala-nagar-II, Kamalanagar-III leh Kamalanagar -IV ah te 'Auxiliary Polling Station'  siam a ni bawk ang.

Chakma Autonomous District Council (CADC) huam-chhunga Village Council (VC) inthlanna neih tur atana  'Final Electoral Roll' tlangzarhna inkhawmah hian Political party aiawh lo kalkhawmte hnenah 'Final Electoral Roll' Copy khat theuh Pu Zoramsiama Hmar, Deputy District Election Officer chuan a hlan nghal a ni.

Lai Autonomous District Council I & PR Department ten Chanchinbu enkawlna leh inkaihhruaina an siam

 Rauthla 11.02.2025 : Nimin khan Pu Lalropuia Chinzah, Executive Member i/c I & PR Department LADC chuan, LADC sorkar-in chanchinbu enkawlna leh inkaihhruaina dan Information & Public Relations Department in a siam chu chanchinbu mite  hnenah a hlan.

Pu Lalropuia Chinzah, Executive member i/c Information & Public Relations Department chuan, Information Department te hmalakna in Lawngtlai a chanchinbu chhuak te inkaihhruaina leh inenkawlna a siam hman theih ani tur chu lawmawm a tih thu a sawi a. LADC sorkar in hun rei tak atanga a lokal pui tawh, chanchinbu eng emawzat laiin Advertisement leh subscription te pek an nih thin thu a sawi a. District Council a Information Dept pawhin kawng hrang hrangin hmasawnna hmu mek zel a. Department lama thawktute inpekna piah lamah, Lawngtlai a chanchinbu mite nen thawhhona tha tak an neih avang anih thu a sawi a. State Sorkarin chanchinbu inkaihhruaina leh enkawlna a siam zulzuiin  hun eng emaw chen chu kan lokal tawh thin a. Tunah chuan keimahni siam ngei hman anih thei tur hi a lawmawm hle a. Thawktute inpekna a ropui a, chanchinbu mite tan pawh a tangkai hle turah ka ngai a ni, ati bawk.

Pu K. Lalthanzara, Executive Secretary, LADC pawhin thusawiin, Information Department LADC ten, LADC sorkar hman tur, Chanchinbu enkawlna leh inkaihruaina felfai tak an siam thei hi an fakawm ka ti hle a, LADC Sorkar hun kal tawha khan hetiang hi kan la nei ngai lova, tunah chuan felfai taka kan lo neita hi hmasawnna ropui tak ani, hei hi Bill siam a, Session a pass kher ngai lovin, Executive Committee in a pawm hnu a Office Memorandum hmanga hman tura chhuah mai chi a ni a, tunah peih fel a lo nita hi a lawmawm tak zeta, Chanchinbu mite nen pawh thawhhona tha zawk kan neih zel kan beisei bawk a ni, a ti bawk.

Lawngtlai District MJA President Pu Elvis Lalthangzuala pawhin thusawiin, LADC in chanchinbu enkawlna leh inkaihhruaina tur mumal tak a buatsaih thei chu lawmawm a tih thu a sawi a. Hei hi chanchinbu mite tan pawh chona lian tak a ni dawn a. Chanchinbu kan enkawlna kawngah pawh hmasawnna thar min pek ngei pawh a beisei awm a ni,a  ti a. Tin, Information & Public Relations Dept in kawng hrang hranga hmasawnna a nei chho zel chu lawmawm a tih thu leh theihtawp chhuah tan la a, Journalist te nen pawh thawhhona tha tak nei chhunzawm zel turin pawhin thawktute a sawm bawk a ni.

He hun hi Pu C. Lawmsangzuala, I&PRO, LADC chuan kaihruaiin, Pu Lalropuia Chinzah chuan, Chanchinbu Enkawlna leh  Inkaihruaina Office Memorandum hi a hlan nghal a ni.

Lawngtlai ah Road Safety Month hman dan tur rel

 Lawngtlai, 4th February 2025 : Vawiin chawhma dar 11 khan Lawngtlai District Level Road Safety Committee bultumin 'Road Safety Month' hman dan tur rela thutkhawmna DC Conference Hall-ah neih a ni a. Pi Margaret J. Vanlalremmawii, SDO (Sadar) chuan thutkhawm hi a kaihruai.

Pi Margaret J. Vanlalremmawii chuan lirthei  khalhtute leh ke a kalte fimkhur tawk loh avang a Accident thleng thinah nunna hlutak chân a ni fo a, India ram pumpuiah phei chuan nunna chân hi an tam thin hle a ti. Motor khalhtute fimkhur a tul rualin, mipuite pawhin fimkhurna tur an nei sang hle tiin, mitinin mahni mawhphurhnaa ngai a, fimkhur tlan a tul hle a ti a. SDO (S) chuan kum tinin 'Road Safety Month'  hman ni thin mahse road accident avanga nunna chan an la awm fo thin chu pawi a tih thu tarlangin, Motor accident- avanga thihna thleng tawh lo tura tan la thar theuh turin kalkhawmte leh Lawngtlai mipuite a sawm nghal a ni.

Thutkhawmah hian Directorate of Transport in 'Action Plan for Road Safety Month'  a duan chu sawiho a ni a. Lawngtlaia High School leh Higher secondary School zawng zawngah 'Road Safety Pledge' thutiam laktir   ni se, Road Safety Month pualin Animation/ Short Video siam leh thehdarh  ni se tih a ni a. Lawngtlaia Black spot/ Pot holes awmte siamthat leh signage tam zawk tar  ni se tih niin, 'Best Driver' leh 'Best Traffic Police' hnenah Certificate hlan ni se, Surprise Checking - pawh a tam thei an bera neih ni se tih a ni bawk.

Road Safety Month hi kum tinin thupui thlan bik neia hman thin a ni a. Kumin thupui atan hian ' Fimkhur leh him takin Lirthei khalh thin ang che' tih thlan a ni a. Lawngtlaiah chuan ni 7 February 2025, zing dar 8:00  ah Areopagy - ah a hawnna hi  neih a ni ang.

Vawiin thutkhawmah hian Lawngtlai District Level Road Safety Committee Member - te an tel kim vek thei a, Pi Margaret J. Vanlalremmawii, SDO (S) chuan lawmthu sawina neiin hun a khar.

HOME MINISTER-IN VC INTHLAN ZAWHAH KUHVA TAWLHRUK A THLAKHNIAM A BEISEI

Aizawl February 4, 2025 : Home Minister Pu K. Sapdanga'n Kuhva tawlhrutu thurualpui VC an awm ni a hriat anih thu leh, VC inthlan zawhah chuan Kuhva tawlhruk a tlahniam sawta a rin thu a sawi.

Nimina  ZPM party pisa a party inkhawmah, Home Minister Pu K. Sapdanga chuan dan leh thupek kenkawh chungchang sawiin, Kuhva tawlhruk chungchangah a tawlhrutu thurualpuia lo tanpui zawk VC an awm tih hriat anih thu a sawi a, Heng VC te avang hian VC inthlan an nghakhlel em em a ti a, inthlan zawh lamah chuan Kuhva tawlhruk pawh hi a tlahniam sawtin an ring a ti a, hei bakah hian halpuah leh halmawi chungchangah thupek bawhchhiat thubuai 52 ziah luhah mi 60 te chungthu chu Court-in a rel dawn a ti a, kuminah pawh Sorkar chuan hunpui laia halpuah leh halmawi khap leh turin January thla khan a rel fel tawh a ti bawk.

Home Minister chuan kum khat emaw chauh Sorkarna an la chelh chungin Zoram mipuiten an chungah beiseina sang tak an nei a, mipui an duhtui em em a, Eptu Party te phei chuan sual laka fihlim turin an beisei a ni ber, a ti a, an hun laia thiltha an tih theih loh zawng zawng ti thei tura an beisei bakah Sorkarna an chelh laia an lo tih thin anga ti ve turin an duh lo niin a sawi a, hetiang Eptu Party an nei chu vannei an in ti tak zet a ti a ni.